政壇：鄉紳擺架勢 大講丁權
新界東北發展爭議多多，尋日有團體喺元朗一間戲院包場，播放一齣講述新界收地嘅電影，仲請咗一班鄉紳出席，啲鄉紳睇戲就免喇？但就同大家講吓鄉事歷史，長毛梁國雄都有到場，大家雖然話不投機，但喺台上就鬥擺架勢咁款，仲好睇過戲喎！
梁福元（台上左一）同侯志強（左二）出席座談會，大談丁權嘅由來。
出席座談會嘅十八鄉鄉事委員會主席梁福元由清朝講到港英政府，解釋丁權嘅由來；而上水鄉委會主席侯志強就話，城鄉共融最緊要，因為新界人都係香港市民一分子，期望畀公平同平等嘅眼光看待，又話如果港府取消丁屋政策，咁新界七、八十萬原居民就會去同城市人爭公屋，大家分分鐘排三十年都未上到樓。所以佢哋就向政府建議，優化丁屋政策，容許原居民「套丁」用兩個或以上丁牌嚟起四至六層高嘅丁屋喎。
