政壇：潘少絕橋「剔格仔」抗拉布

立法會經歷十四日苦戰，搞掂預算案有關嘅近一千二百項「拉布」式修訂，勞工界潘兆平（潘少）話唔止坐足十四日，近一千二百項修訂佢都逐一「準確無誤」咁投反對票。不過，潘少絕對冇好似主席咁患上「斯德哥爾摩症候群」，仲建議立法會「紙上表決」抗「拉布」添！

潘兆平建議立法會用「紙上表決」，一次過反對「拉布」修訂。（資料圖片）

潘少笑住話，秘書處可以好似賽馬會六合彩獎券咁，將「拉布」式動議列晒喺張紙度，議員只要剔格仔就可以表態支持定反對，再搵掃瞄器一掃就知道議員表決結果，既慳番響鐘投票時間，又唔怕流會或議員投錯票，一舉三得喎！咁講法，立法會咪淪為投票機器？如果咁都得，不如直接叫主席逢「拉布」修訂都反對，咁仲有效率。