政壇：董吳玲玲搞慈善唔驚畀人話洗腦

港人成日以獅子山精神為傲，仁濟醫院前主席董吳玲玲前日响新界社團聯會（新社聯）嘅活動中透露，佢正忙於籌辦一間慈善機構，希望喺十月後成立，而呢個機構係用個人名義搞嘅，以青年人同小朋友為服務對象，希望可以畀社會多啲正能量，喚醒港人嘅獅子山精神喎。董太成立呢啲機構，唔驚畀人話搞洗腦咩？

董太話預咗有人咁講啦，但香港近年太多悲劇發生，社會需要多啲人去關愛，小朋友又有正面思想，所以唔存在洗腦問題喎。佢仲話，到時可能會搵埋新社聯合作都未定，希望之後會發展成一個全港性嘅機構。新社聯理事長陳勇就話，如果董太搵佢哋合作實支持，因為社會需要更多正能量喎。