政壇：青聯招工日 名人二代分享經歷
投身社會嘅畢業生開始搵工，香港青年聯會（青聯）尋日舉辦第六屆招「工」日，多名成員撐場，霍英東集團行政總裁霍震寰孻仔霍啟文都有分享吓工作之道，佢自爆，畢業後曾執靚個履歷去見工，仲爭到會計師樓一個唔錯嘅就業機會添，點知爸爸要佢放棄份工，返公司幫手，結果佢畢業後第一份工都做唔成。康泰董事總經理黃進達（Jason）就提示求職者一定要準時，否則唔會被請。
霍啟文（左）及黃進達（右）於招「工」日上分享個人見工及請人經歷。
至於Jason就諗起自己响英國讀大學一年級時都有喺旅行社工作，畢業後，投身家族公司，佢成日都要請人，對求職者嘅要求就係一定唔可以遲到，尤其係旅遊業，準時好緊要，錯過班飛機就好麻煩嘞。
青聯賢慧社召集人周沁及活動副召集人鄭詩韻就話，女士見工唔使打扮得花枝招展，端莊、整齊已經夠。講起面試，鄭詩韻透露當年畢業適逢九七年金融風暴，原本三、四月時應承聘請佢嘅公司管理層都被裁走，結果佢到年底先搵到工作，佢勸年輕人搵工唔使急，最緊要準備充足。
