立法會財務委員會前日審議新界東北發展計劃前期工程撥款申請,土地正義聯盟、二十幾個新界東北村民同青年重奪未來等人,聚集响立法會大樓抗議,佢哋一行數十人本來喺立法會外請願,之後以葉寶琳為首嘅土地正義聯盟率先衝入,繼而想衝上去開緊財委會嘅會議室。不過,計劃最後宣告失敗,皆因示威期間,立法會受到黃洋達為首嘅熱血公民等成員衝擊,即時加強保安之餘,仲要報警添,最後全部示威者都被困大堂。呢件事搞到熱血公民同土地正義聯盟嘅支持者喺網上爆發罵戰,互指對方不是,真係鬧劇一場。

設計圖片及對白

財委會嘅撥款申請備受關注,土地正義聯盟等團體亦一如過去幾星期,喺會議期間聚集於立法會外示威抗議,前日佢哋唔知係咪想學台灣嘅學生運動,突然喺無預告下,由立法會示威區衝入立法會大堂,由於大堂屬於公眾地方,所以保安人員無阻止。

不過,據聞喺呢個時候,熱血公民等人唔知係咪想嚟湊熱鬧,就叫埋其他成員到場,保安見狀決定報警。當時嘅立法會七國咁亂,保安及警方喺立法會外嚴陣以待,立法會內嘅保安更加嚴密,多個樓層落閘,議會一度變成迷宮,呢批示威者就係咁,被困立法會大堂,雙方喺現場已經互相指罵,隔咗一晚,罵戰升級到網絡罵戰。

市民斥責 又唔檢討

有參加者話,呢次運動宣告失敗,好大機會係衰响內部嗌完交,元氣大傷喎。雙方陣營支持者繼續互咬,熱血公民成員大鬧土地正義聯盟弱,話佢哋做呢件事好無聊,且佔領立法會唔可以亂做喎。而土地正義聯盟嘅支持者就反鬧熱血公民唔理智,採用暴力。不過,闖入立法會呢個行動其實畀更多市民斥責,佢哋又有冇檢討吓呢?

第一手消息請下載on.cc東網iPhone/iPad/Android/Windows Phone Apps