餐廳掠水！走冰加兩蚊
早前有名人在酒店歎茶，鬧出「茶包裏的風波」，原來本港不少餐廳的收費規矩亦千奇百怪，易引起爭拗。有食肆為搞噱頭，以外幣標價港紙埋單，更自訂「十算」匯率，可能構成不良銷售。又有餐廳規定凍飲走冰加兩元、加醬混醬要加錢、「粉狀飲品」當特飲計等，令顧客一肚氣。今年首四個月，消委會收到有關酒樓餐廳的投訴個案，已較去年同期急升近三成，當中逾五成涉價格及收費等爭拗。有業界指食材價格及租金等成本急增，或有同業因此巧立名目加價「掠水」。
外幣標價 自定匯率
位於元朗的茶餐廳，如食客要求凍飲走冰，需額外付兩元。
混醬多收3元
華田可力當特飲
顧客點睇
郝小姐（大學生）：「我覺得餐廳咁定價係特色嚟，最緊要佢寫清楚，但『十算』太高，自己都會睇清楚餐牌先幫襯。」
李小姐（遊客）：「如果想留住個客，走冰都加錢唔係咁好；畀我做老闆一定唔會連汁都加（錢）。」
個案1：外幣埋單竟然又唔收
天后一間日式餐廳門外擺出午市定食宣傳牌，牌上價格全以日圓標示。記者以顧客身份光顧，發現餐牌同樣以日圓標示價格，下方卻印有「100円=HK$10」匯率。以一千六百八十日圓的雜錦魚生飯定食計算，港幣折合為一百六十八元。若按現時匯率計算，則只需一百二十八元。
記者欲以日圓結帳，卻發現帳單只列出港幣價格，侍應亦拒收日圓，「我哋唔收円（日圓）o架，餐牌寫明收港幣。」侍應指做法只屬噱頭，餐牌已列明匯價屬餐廳定價，只收取港幣。有食客批評餐廳匯率過高，餐廳門外的午市宣傳牌亦沒列明匯率，有誤導之嫌。
一街之隔的意式餐廳亦有相同情況，食品以歐元定價，用一歐元兌換港幣十元結算，與市面匯率相近。有網民不滿餐廳收費方法，「點解餐牌用歐元定價，但唔准收歐元？睇到餐牌要再自己換算番，好麻煩。」
個案2：走冰加價因「多咗奶茶」
「凍飲要加兩蚊，走冰要再加多兩蚊，多咗（奶茶）畀你嘛，你唔想加錢咪少冰囉！」在元朗一間茶餐廳內，記者「柯打」凍奶茶走冰時，侍應即指因走冰會令奶茶分量較多，故原本十五元的凍飲需額外加收兩元。記者追問為何有這項收費時，她指是公司規定，但當記者指餐牌上沒列明有關附加費時，她卻支吾以對。食客黃小姐直斥：「凍飲加錢因為加咗冰，依家走冰又加兩蚊，咁咪好矛盾？係咪多冰收少番兩蚊先？」
個案3：「唔想人浪費」
位於紅磡的快餐店售賣薯條會附送兩包茄醬，隨後每包收費一元。「我係唔想客人浪費。」快餐店負責人鍾先生解釋，發現愈來愈多年輕人「拎完又唔用」，只好收費，他指每包茄醬來價亦僅約一元。
另外，該店馳名的麵包可附送一款醬汁，如食客想「混醬」的話，便需每款多付三元。鍾先生表示：「我哋整嘅麵包係秘製，識食一定係配一個醬食，『混醬』嘅話反而影響原味。」
個案4：「來貨價貴咗」
有網民在討論區炮轟有茶餐廳開始向「粉狀飲料」加價，「開頭我以為外賣加一蚊，點知係杯熱華田（要加）。」餐廳侍應向該網民稱，由於粉狀飲品來貨價上升，故要加錢。不少網民對此大感驚訝，直言「寧願唔飲」，亦有網民指有些食店甚至加價兩、三元。
