為了啟迪民智，香江政府舉行發電能源組合諮詢，並循循善誘告訴大家，這個方案有甚麼不好，那個方案又有甚麼優點，五花八門的技術字眼，看得小文暈頭轉向、腹中打鼓，乃悻悻然走入茶餐廳醫肚。

老闆：為咗推廣健康飲食，本店隆重推出A餐同B餐，兩個餐都採用有機澱粉，價錢都比以前貴咗一倍。呢位先生，你揀邊樣呢？

小文：A餐用強國澱粉，所謂健康唔知係真係假，都係揀番本地澱粉嘅B餐啦。

老闆：唔會，強國供應商向我哋保證質料上乘！再講本地澱粉較貴，所以B餐需要額外加收五蚊「澱費」，小數怕長計，不如都係揀番A餐啦。

小文：咁又係，我哋呢班收入微薄嘅基層市民，每使一蚊都要諗過度過，係呢老闆，可唔可以散嗌，比較吓邊樣平啲呢？

老闆：唔好意思，唔可以喎，只可以揀套餐。

小文：咁仲有咩餐呀？

老闆：仲有C餐D餐E餐，同埋特餐。

小文：分別係咩呢？

老闆：四個餐都同A餐一樣，不如揀番A餐啦。

小文：啊……

老闆：咁咪好囉，諗咁耐……呀係呢，對於澱粉組合，本店持開放態度，歡迎顧客提供意見。呢位先生，你有咩睇法呢？