小一學位爭崩頭 跨境學童更添憂

嗱，本港適齡學童人數不斷上升，今年參加統一派位嘅學生有近三萬名，較舊年增加近一千五百人，尤其係跨境學童人數大增，結果獲派首三志願小學嘅命中率繼續下跌，只有百分之六十六，創十三年新低，唔少家長只能失望而回。正如教育界人士話齋，家長嘅選擇只集中喺少數心儀學校，加上跨境學童嘅因素，學額短缺問題雪上加霜，命中率自然下跌喇。

面對跨境學童問題，當局束手無策，惟有臨急抱佛腳，增設所謂「跨境學校專用校網」，涵蓋範圍擴大到東涌、馬鞍山同黃大仙等地區，其中一向受跨境學童追捧嘅北區只預留三百個學額咁大把，僧多粥少之下，參加專用校網派位嘅一千六百名跨境學童，多數被派往遠離邊界嘅地區，家長唔徬徨就假。

更荒謬嘅係，面對適齡學童尤其係雙非學童不斷增加，教育當局唔係制訂長遠政策解決問題，而係頭痛醫頭，腳痛醫腳，但求敷衍了事，得過且過。好似觀塘區咁吖，由於近年多個屋苑相繼落成，區內小一學額由目前至二○一九學年都嚴重短缺，教育局無計可施，竟然推出區內兩間「火柴盒式」空置校舍，畀辦學團體復辦限期九年嘅「短命小學」應急，問你服未。

教育局係咁講嘅，觀塘區小學學額短缺只係過渡性，當學額供求穩定之後，校舍就要歸還政府。當局就講得輕鬆咯，問題係開辦一間學校需要大量人力物力，當局打完齋唔要和尚，到時教職員失業，校方投資化為烏有，呢啲問題點解決？難怪教育界大潑冷水，有辦學團體肯落疊至奇吖。

所以話啫，港府教育政策混亂，簡直誤人子弟。歸根究柢，呢啲都係前朝貪曾政府留低嘅爛攤子，如果唔係貪曾好大喜功，大搞醫療及教育產業，對雙非孕婦中門大開，又點會搞成咁吖。咁多年來，雙非兒童累積多達二十萬，問你怕未！

總而言之，前人種禍，後人孭鑊，爛攤子雖然係前朝留低，但現屆政府有責任撥亂反正，一味小修小補，根本唔係辦法。咪話太一叮唔提醒，跨境學童年年增加，學額不足牽一髮而動全身，今日小學，明日中學，後日大學，港產官僚繼續懶懶閒，遲早爆大鑊嘅咋，叮！