「課金」係一個由網上遊戲嘅術語演變而成嘅潮語。「課金」當然唔係解上「課」要交嘅學費。「課金」本來係指某啲網上遊戲，需要玩家付費，從而得到一啲道具或角色，令到玩遊戲時更加得心應手，例如轉珠遊戲Puzzle & Dragon就每每需要玩家「課金」，令玩家更強，呢啲「課金」亦為遊戲開發商帶嚟可觀嘅收入。有網絡電台本來話免費提供節目，但係後來就改口，要求聽眾「課金」支援運作。以致「課金」加上另一種含意，就係籌款咁解。

六四事件二十五周年，呢件發生喺北京天安門嘅慘案，一直都係有良知嘅中國人心中一條不能磨滅嘅疤痕。喺四分一個世紀之後嘅今日，被稱為屠夫嘅政權，今天依然健在，比起二十五年前更加強大。經過六四事件，呢二十幾年中國人似乎已進化到另一個模式，就係「道義放兩旁，利字擺中間。」全民拜金、拜權力，用最快速度不擇手段賺最多錢，然後逃離中國，遠走他鄉。記得二十多年前有本預言小說《黃禍》，講述中國未來發生內戰，整個國家毀滅，億萬中國人流徙到世界其他地方。今日，呢個預言以另一個形式實現了，不同嘅係，佢哋帶畀全世界除咗錢，仲有具有中國特色嘅社會主義文明，即係咩？心照不宣。今年六四周年，維港兩岸分別有不同嘅悼念活動。有人不滿「支聯會」壟斷紀念集會多年，但對中國民主及香港民主毫無建樹，於是喺尖沙咀另起爐灶，以反共為主題，提倡本土主義。不過，有去過尖沙咀嘅市民，發覺一樣有籌款、要「課金」，紀念六四一樣只係口號，令有啲參與者呻笨。

「課金」作潮語用，就即係廣東話俗語「科水」。但凡網上遊戲或網站，需要你額外付費購買服務，都可稱之為「課金」。話時話，政黨政客或者一啲組織要籌款去支持運作，本來都係正常不過。但係，有啲組織，指摘人哋每年六四集會只為籌款嘅時候，自己一樣攞個箱出嚟要人「課金」，並將悼念活動變成宣傳政綱，咁……又好似有點兒那個。無論如何，在先人嘅血上面謀取私利，點都唔會支持，包括支聯會！

第一手消息請下載on.cc東網iPhone/iPad/Android/Windows Phone Apps