SUN搞作：少膽虫手記：少膽虫做腦細
「阿虫，為咗壹全霉，你可以去到幾盡？」淫賤黎突然問個咁嘅問題，好日唔遲到嘅我當堂啞咗幾秒，之不過本虫話晒都係腦腫，心念一轉，已經用行動表達對份工嘅重視，就係將份《爛果》一啖一啖咁食落肚，同時鬼食泥咁嗌：「一日一《爛果》，銷量呵呵呵！」正當我發覺原來《爛果》夠晒鹹幾好食之際，淫賤黎喺我口中一手搶番份《爛果》，繼而怒罵：「呵你個頭咩！啲賣唔出嘅《爛果》要拎去當廢紙賣o架，醒少少啦！」
畀淫賤黎噴到一面屁，丟低咗半世人嗰樽鹽唔知點解失常大爆發，本虫一手扯住淫賤黎衣領、一手指住佢個鼻挑機：「問我可以去到幾盡？依家我唔撈！夠盡未？」少膽虫我轉身就走，真係估唔到淫賤黎會一手拉住我：「阿虫，係我脾氣唔好，原諒我！其實我係諗住畀個腦細位你，先至試吓你啫！」
呢一刻嘅震撼，直情好似《雷雨》x1000咁，淫賤黎見我呆晒，即刻喺櫃桶攞咗份嘢出嚟：「阿虫，簽咗佢啦，簽咗佢即刻做腦細喇！」少膽虫生怕有變，超光速簽上大名，淫賤黎見狀陰陰嘴笑：「阿虫，頭先你仲未返，班細嘅話公司又裁員又跌紙，士氣好低落，想我搞啲活動振奮吓，你知啦，乜都係錢，既然你簽咗名今晚做腦細，全公司今晚就直落玩大佢！啲使費喺你份糧度扣，白紙黑字，唔使諗住反悔！哈哈哈……」
