政壇：梁宏正初打高球曾傷父
香港保護兒童會尋日在清水灣鄉村俱樂部舉行名人慈善高球日，城中富二代齊報名展身手，立法會議員梁君彥公子、菁英會主席Clarence梁宏正都帶隊參賽。見Clarence揮桿揮灑自如，但原來當初學打高球時「蝦碌」盡出，除咗試過打斷球棍，有次更一球打中匿喺樹林搵緊波嘅爸爸，嚇到佢冷汗直標，以為自己打死爸爸。
苦練高球十五年的梁宏正，揮桿有姿勢有實際。
品牌高層Damien Vernet（右）落場打埋一份以示支持，周瑋瑩（左）親表謝意。
Clarence尋日冒雨為慈善揮桿，未見爸爸同行，唔通怕咗同佢打波？佢笑言嗰次係意外，無心「打人」。回想打傷爸爸一刻，驚到不知所措，擔心爸爸一旦有乜三長兩短，以後無人養佢喎，認真風趣。意外後，梁君彥無怪責兒子，仍經常一齊打波。佢話爸爸試過兩次一桿入洞，要跟爸爸學嘢至真。
講番場高球賽，由名媛兼保護兒童會籌款委員會主席Jacqueline周瑋瑩牽頭，名醫陳曦齡新抱Tina謝金承美拍心口擔任高球日籌委會副主席，Tina仲派出媽咪李春喜落場，自己就喺場邊做啦啦隊。活動吸引近一百人出席，合共籌得近一百萬元。
Jacqueline話筆錢會用作支援兩間兒童及家庭服務中心嘅營運開支，事關佢同呢個會好有緣，太婆係呢個會創辦人之一，當年不時在旺角街頭派粥畀窮苦家庭嘅小朋友。佢媽媽都服務呢個會逾二十年，依家交棒畀女兒，望延續助人精神。提起日前發生一宗殺女悲劇，佢都話好心酸，希望天下間父母痛錫子女。
