喺維園舉行嘅六四晚會日前曲終人散,大會宣布當晚有逾十八萬人進場悼念六四。雖然泛民主派做親搞手嘅晚會和遊行都會被質疑「報大數」,但建制派多年來對六四晚會都選擇出少句聲當幫忙,以免再挑起火頭變相幫泛民「谷」人數。不過,立法會議員Ann蔣麗芸似乎唔係咁諗,仲特地摷番○九年報章報道,質疑「維園能坐十八萬人嗎?」結果梗係再惹爭議啦。

六四晚會事隔兩日,阿Ann無端端喺社交網站引用報道,指有香港大學學者認為,即使維園逼爆都只能容納約七萬至十萬人,質疑○九年大會宣稱有十五萬人出席晚會係咪「報大數」。雖然阿Ann有唔少「朋友」都留言支持佢嘅睇法,但亦有人留言鬧爆佢嘅支持者係「土共」。

阿Ann隨即留言為「朋友」擋箭,澄清自己只係畀資料大家參考吓,社會有唔同聲音好正常,唔好動輒話人「土共」喎,仲話「你不高興就天天來駡我好了!」阿Ann喺風頭火勢發表咁惹火嘅言論,又唔知目的何在,有時谷人氣都唔一定要靠博鬧嘅。

第一手消息請下載on.cc東網iPhone/iPad/Android/Windows Phone Apps