設計圖片
好多政黨隔一段時間就會搞集思會，等班黨員「腦震盪」，一來檢討下過去嘅不足之處，同時睇下可以震出乜嘢新思維，訂出未來嘅路線。新民黨就將喺本月十四至十五日到深圳舉行兩日一夜集思會。之不過，搞集思會嘅實際地點喺邊就有好多傳聞，一直都無得到確認。
身兼該黨主席嘅立法會議員葉劉淑儀尋日趁會議空閒時間，聯同黨內一班區議員，包括多名公民力量沙田（公記）區議員一齊請大家食壽司。葉劉趁機大談集思會嘅計劃，但當被問到會議地點同參與嘅人，佢就一概封口，話班黨友到上車後就知喎！
其實，有建制派都曾經去內地開集思會，既可避開公眾耳目，又可以困獸鬥，班黨員咪使旨意無啦啦溜走，亦冇可能遲到早退。新民黨揀去深圳開都可以因為呢個原因，但點解搞到咁神秘？莫非有特別人物做嘉賓？當葉劉被問到呢個問題，佢就照樣唔答，仲意圖扯開話題添！佢話作為政黨梗係會傾選舉嘅事啦，至於唔透露地點，就係為咗要保護有意參選或準備參選嘅朋友喎。
葉劉帶靚茅台共享
佢同公記一班兄弟講，佢會帶埋屋企兩支珍藏多年嘅茅台去集思會，呢兩支茅台係由「茅台黃」送嘅，邊個係「茅台黃」？咪係立法會前議員黃宜弘囉！
葉劉話「茅台黃」送嘅酒一定係好嘢，集思過後就一齊暢飲一番。佢又問公記邊個最飲得，班議員就齊齊指住身兼新民黨副主席嘅公記主席潘國山，似乎大家想隊冧潘國山咁喎！
第一手消息請下載on.cc東網
