會議室冷冷清清 懶官僚求求其其

係咁嘅，民政事務總署轄下有社區會堂及社區中心會議室供公眾租用，講就好聽喇，為市民服務喎，可惜得個擺字嘅咋。本報抽查其中港島東、深水埗及沙田等五區共三十六個會議室嘅使用情況，發現上個年度各區嘅平均使用率全部「見紅」，僅得一成九至五成三，整體平均使用率只得三成七。

更誇張嘅係，部分會議室嘅使用率居然低至單位數，好似觀塘順利社區中心會議室咁，使用率只有百分之六，而大埔區兩個會議室分別只有一成及一成一。會議室使用率唔夠一成，即係大部分日子都係丟空養蚊，你話係咪尋尋覓覓，冷冷清清吖？

社區會堂會議室出名租金平，點解冇人吼呢？不外乎三個原因，一係配套不足，一係手續繁複，一係限制太多。本報記者巡視多個會議室，發現配套設備天殘地缺，連開會必備嘅喇叭、咪高峰同投影器都欠奉，做小學課室都嫌簡陋喇，搵鬼幫襯咩。至於申請手續，同樣令人卻步，事關每區租用手續都有差別，以租用時數限制為例，有啲以每周上限十小時計算，有啲就以每季不超過八十小時計算，政出多門，令人無所適從。

最好笑嘅係，社區會堂會議室拍烏蠅，租用程序仲要限制多多，變相趕客。會議室爆滿就話要提早預約，先到先得啫，家陣會議室拍烏蠅，一樣要求提前一至兩季申請，呢啲咪叫官僚囉，僵化囉。

所以話，港產官僚做事永遠是是但但，只求方便自己，話提供會議室畀市民租用喎，講就好聽喇，實際得個樣，有會議室等於冇會議室。本來呢，香港租金高昂，當局提供廉租會議室，回饋社區，方便市民，不失為德政，可惜當局做啲唔做啲，搞到市民寧願租用租金較昂貴嘅私人會所，都唔吼社區會堂會議室，結果得物無所用，唔止浪費公帑，簡直愧對市民喇！

講開又講，當局做啲唔做啲，社區設施得物無所用，又點止咁多吖。好似粉嶺有個極限運動場，斥資二千幾萬元興建，為本港花式小輪車玩家而設，點知設計失誤，陷阱重重，搞到人人卻步，遊樂場淪為廢場。

李清照嗰首詞結尾係咁嘅：這次第，怎一個愁字了得。講真，對住班敷衍塞責嘅官僚，市民想唔愁都唔得喇，叮！