城中鏡：葉詠詩樂韻化解戾氣
近期頻頻發生槍擊案、斬人等暴力事件，著名本地女指揮家葉詠詩前晚出席林耀基中國音樂基金晚宴時話，多啲舉辦文化同音樂活動，有助大眾減壓同宣洩各種負面情緒。佢話好多政治不及香港穩定嘅地區，都有頻繁舉行文化及音樂活動，本地或可效法，有助化解社會戾氣。
葉詠詩（中）出身於音樂世家，日前帶埋爸爸葉惠康同媽媽出席活動。
楊天媧身上古董小提琴價值約三百萬美元，影相都不離身。
鄭志剛（左二）同太太余雅穎（左一）、許曉暉同譚允芝，都係熱愛音樂之人。
講到本地學習音樂嘅風氣時，葉詠詩話香港學樂器嘅小朋友比其他地方多，但深造則較少。皆因本地家長好聰明，知道有一技之長可方便子女入讀心儀學校，逐漸形成一種風氣。對於好多家長認為音樂搵唔到食，佢就話當一個人真係鍾意音樂，就會特別努力，成就便會更大，搵到嘅錢自然就更多，所以家長應放手讓子女去做喜歡嘅事。
楊天媧300萬美元古琴獻技
當晚活動仲請到林耀基生前嘅得意門生、小提琴新星楊天媧獻技，佢帶埋有二百八十幾年歷史嘅古董小提琴即席演奏，古琴價值約三百萬美元，難怪佢寸步不離古琴，連影相都要孭住。基金董事之一嘅新世界發展執行董事鄭志剛亦有出席，原來佢讀書時都學過鋼琴，而且仲係唱得之人，對培養具潛質嘅年輕音樂才俊不遺餘力。
基金副主席譚允芝就話，設立獎學金可發掘年輕音樂人才，仲宣布今年已挑選咗一位年僅十六歲嘅中提琴手沈子鈺於暑假遠赴瑞士維爾比耶夏季音樂節體驗學習。同場仲見到民政事務局副局長許曉暉同監警會前主席「翟少」翟紹唐，原來翟少都學過大提琴，仲喺學校樂團表演咗五年咁耐，但佢話冇考到任何級數，學校亦冇用級數衡量佢哋加入樂團嘅能力。
