設計圖片及對白
喺高鐵工程延誤醜聞爆出之後，連日只見運輸及房屋局局長張炳良現身受靶，但同樣有份負責嘅副局長「邱副」邱誠武就被批評隱形，不但冇交代個人責任，出席立法會會議更加粒聲唔出，惹來各方狠批。事隔成個月，可能見風聲冇咁緊，邱副尋日喺報章撰文死撐自己冇隱形，歸咎只係冇議員向佢質詢啫，佢又執上司口水尾，聲言如果專家小組發現佢要負責，佢願意辭職喎。連交代責任都唔敢現身，仲唔係隱形？
邱副撰文話，佢兩次出席立法會鐵路事宜小組委員會特別會議，只得議員范國威向佢提問，所以佢唔係特登唔出聲，仲聲稱呢個月嚟出席好多公開活動，隨時準備答記者提問喎。佢咁講法，即係賴議員同記者冇向佢質詢啦！不過，據聞佢上任咁多年來，似乎唔係好聽記者嘅電話，幾近隱形，完全係官場上「少講少錯、少做少錯、唔做唔錯」嘅陋習。
事實上，邱副由上屆政府開始已跟進高鐵項目，更有指運房局內部分工，由邱副主力運輸事務，而局長張炳就主力房屋。翻查資料，喺港鐵行政總裁韋達誠打畀張炳當晚，係邱副出席同港鐵嘅緊急會議。不過，邱副喺文中就死撐，佢喺局內無專責某一政策範疇，只係協助局長處理各項獲指派嘅工作。不過，佢將受指派嘅工作搞到一鑊粥，仲要側側膊卸責，佢每月人工最少十八萬元，如果撫心自問，係咪物有所值呢？
另外，港鐵行政總裁韋達誠明年八月離職，有報道引述消息話，港鐵已聘請獵頭公司負責招聘新CEO，有傳其中一個人選係現任港鐵副行政總裁梁國權。另外，早前張炳講過為港鐵董事局注入新血，有消息話加入董事局嘅係發展局工務科常秘韋志成，係咪真有其事，相信好快就知。
第一手消息請下載on.cc東網
