公用股穩穩陣陣又派息高，唔少投資者都好like，每次去呢啲公司嘅股東會，都有逼爆感覺。尋日中華煤氣舉行股東會，吸引咗成千六個股東參加，趁墟咁嘅場面，聽煤氣老友講，近年嚟參加股東會嘅股東愈來愈多，今年仲係最多人嘅一次，無他嘅，對股東好，自然多人支持！

畀股東嘅餐盒齋睇外形已覺精美，內涵仲好得添！

股東一場嚟到，主人家總會有啲嘢食慰勞吓，而煤氣尋日就準備咗個餐盒，齋睇外形已覺精美，內涵仲好得添，蝦餃燒賣呢啲基本嘢一定有，睇真啲，仲有燕窩蛋撻同鮑魚海鮮酥，唔怪得股東個個相當滿意啦！

不過，最好嘅當然唔係嘢食咁簡單，舊年煤氣就繼續每十股送一紅股，有小股東就喺會上問以後集團會唔會繼續派紅股，煤氣主席李兆基就話「送咗幾年，希望能夠繼續送。」而管理層就補充，如果可以，盡量會派發紅股，但係就唔可以保證喇！

第一手消息請下載on.cc東網iPhone/iPad/Android/Windows Phone Apps