政壇：基金獨行俠 橫掃華爾街
所謂「輸人唔輸陣」，人哋嘅基金公司有成百人嘅team做支援，David Abrams旗下嘅基金公司Abrams Capital Management LP，員工一隻手數晒，八十億美元一個人話晒事？唔怪得Abrams個頭有啲禿啦，可能壓力真係太大啦。
David Abrams為人低調，同一般成日上電視嘅基金經理好唔同，佢從來都未試過喺公眾場合發表演說，佢甚至希望大家搵唔到佢。
正常一間擁有咁上下資產嘅公司都會有過百個員工，佢間公司就淨係得三個分析員同一班後台員工，而每單交易都需要Abrams同意先得。得咁少員工仲要乜嘢都自己話晒事，唔通佢真係以為自己有三頭六臂？
人就係單薄啲，但呢五年嚟佢幫投資者賺咗過億，仲令自己做埋億萬富豪。公司由九九年成立到依家，旗下主要基金已錄得平均每年百分之十五嘅回報率，收益係標普五百指數嘅三倍。《華爾街日報》就幫佢計過，舊年佢一隻主要基金嘅回報率就達到百分之二十三。
一個單靠自己就可以游走於華爾街呢個金融世界，仲可以創造出巨額嘅財富，你話唔係「華爾街獨行俠」又係乜呢？
