政壇：蘇錦樑終上帳委會受靶
立法會政府帳目委員會本周六第三次就盛事基金糊塗帳舉行公開聆訊，之前缺席會議嘅商務及經濟發展局局長Greg蘇錦樑，終於應邀出席當日會議「受靶」，唔使再事事由局內常任秘書長黃灝玄解畫。不過，據聞多名泛民主派帳委會成員將會繼續質問龍獅節籌委會活動召集人「橄欖」陳鑑林，預料同橄欖分屬黨友嘅阿Greg都恐怕難逃一劫。
蘇錦樑將到帳委會公開聆訊，為盛事基金嘅糊塗帳解畫。
有議員私下形容，阿Greg延至本周六先現身算係好彩，首先「拉布」戰歷時逾一個月，原本好緊湊嘅帳委會公開聆訊都要讓路，因此先會出現上次同周六嘅公開聆訊，前後相隔半個月舉行。不過，阿Greg早前因外訪未有出席聆訊，如果議員有心絕對可以借題發揮，批到佢體無完膚。
由於黃灝玄早前基本上將當局立場講得一清二楚，預料泛民議員將集中火力質問橄欖，但阿Greg作為橄欖嘅黨友，相信無可避免會被火燒身，除非佢為求自保，劃清界線連黨友都唔認嘅啫！
