鍾樹根有份投錯票，唔通過去多日投反對票投到隻手緊咗？
由激進泛民主派就財政預算案撥款掀起嘅「拉布」戰終於告一段落，建制派終於唔使再好似機械人咁坐定定投票。不過，唔知係咪建制派議員連日來以機械式不斷投下反對票，結果尋日投票結束前就發生咗一段小插曲，就係建仔四位議員竟然齊齊投錯反對票，反對部分修正案嘅總目納入附表，認真失魂。
冇出聲更正救唔番
建仔投錯票嘅四位議員包括「象哥」黃定光、陳恒鑌、鍾樹根同葛珮帆。按照慣例，議員投錯票後可以喺主席宣布前即時要求作出更正，但唔知佢哋當時係咪遊緊魂，唔記得出聲要求主席曾鈺成更正投票結果，所以佢哋最後都係當投咗反對票。
象哥就話，之前幾個星期不停投咗千幾次反對票，搞到自己隻手依家一接觸到投票機，就會自動波想投反對票。佢又話只係一時唔小心啫，並唔係專登想投反對票幫長毛喎。另外，有份拉布嘅長毛亦有一條本來要投反對票嘅修正案投咗贊成票，睇嚟大家都係未擺脫到之前投足一千一百九十二項修正案嘅陰霾。
第一手消息請下載on.cc東網
