政壇：白鴿黨 新同盟選戰前鬼打鬼
新一屆區議會選舉將於明年底舉行，建制派同泛民主派各黨已開始各自就分區同人選問題作出協調，務求可以搶到更多議席。泛民素來會根據區議會協調機制行事，但近來白鴿黨同新民主同盟（新同盟）就因為三個荃灣選區爆發罵戰，互相指摘對方無賴野蠻，未打仗先鬼打鬼爆發內訌。
設計圖片
新同盟前兩日宣布該黨有意進攻新界西選區，仲劍指爆出桃色醜聞嘅荃灣區議員林發耿嘅議席，話根據泛民協調機制，公文袋上屆派出嘅候選人得票不足三成，變相失去嗰區嘅優先權，令排第二嘅新同盟可以有權優先派人參選。不過，新同盟立法會議員范國威尋日投訴，白鴿黨喺佢哋宣布有意派人出選後不足二十四小時，就向負責協調嘅民主動力提出該黨有意派人參選，搞到雙方要召開會議作出協調。
范國威轟以大欺小
范國威批評白鴿黨知道新同盟有意進攻該選區，就即刻派人去封殺佢哋，炮轟白鴿黨以大欺小，出盡計謀打壓佢哋，又寸爆對方「唔夠君子」。佢重申新同盟尊重協調機制，至於會唔會退出泛民協調機制以示抗議，佢就話要同執委開會討論後至可以決定。
白鴿黨嘅超級議員「AV仁」何俊仁，上屆就係新界西直選議員，當然唔想放啲位畀倒戈嘅前黨員范國威喇！睇怕呢啲都係同新仇舊恨有關。
不過，白鴿黨葵青區議員尹兆堅就話，該黨一直有喺象石、石圍角同綠楊三區派社區主任服務居民，並唔存在聽到新同盟有意落區後即刻派人「截胡」，又話今次係「君子對着無賴」，被人潑政治污水咁話喎。佢透露，新界西嘅協調報名將會喺下星期一先至截止，各黨都唔知其他黨有冇報名，又點存在嗰幾區已經劃咗畀新同盟呢？雖然下屆區議會選舉仲有一年多，但各黨已經就出選問題大鬥法，相信隨住選舉臨近，一定會更加精彩。
