機場保安如虛設 安全城市好牙煙
往事並不如煙，太一叮又諗起十多年前嘅美國九一一事件。十九名恐怖分子成功避過機場安檢，分別劫持四架航機，分別撞向紐約世貿中心雙子塔同美國國防部基地五角大廈，仲有一架中途墜毀，是次恐襲造成數千人死亡，全球陷入一片恐襲恐慌。所以咯喎，自「九一一」事件之後，全世界機場都加強安檢，高度戒備，成了保衞國土及保護國人安全嘅最重要防線。
端午節啱啱過咗，點解咁快講「九一一」？咪因為香港防線出現大漏洞囉。全球機場金睛火眼，嚴陣以待，而香港機場就外緊內鬆，鬆懈怠職，好似無掩雞籠一樣，唔擔心就假咯。
嗱，機場保安人員繼被《東方日報》及《太陽報》獨家揭發因為「玩手機」分神，令致利刀入侵機場禁區之後，再被踢爆兩宗嚴重懷疑疏忽職守醜聞。其中一宗來自一段錄像片段，畫面清晰顯示一名男子直接手持背囊穿越機場離境大堂職員通道安檢，施施然走入禁區，完全無經Ｘ光機檢查；最離譜嘅係周圍明明至少有四名機場保安把守，四個人八隻眼，居然都無人有所行動，你話唔係發雞盲都無人信喇。俗語話，最危險嘅地方就係最安全嘅地方，估唔到喺機場最安全嘅地方就係最危險嘅地方，萬一突破防線嘅係恐怖分子，背囊裝住嘅係塑膠或者液體炸彈，香港咪已經發生航空大災難？
另一宗保安漏洞醜聞同樣咁離譜。至少四名機場空郵中心女保安員被揭發喺執勤期間公然偷懶，分別喺Ｘ光機及金屬探測器崗位瞓覺或者打機，令安檢措施形同虛設。見微知著，空郵中心屬於禁區位置，職員居然可以大模廝樣偷懶，又瞓覺又打機，機場保安有幾鬆懈，可想而知喇。
所以話啫，官僚靠得住，豬乸會上樹，靠港產官僚守衞機場防線，真係搭飛機都得咯。本港啱啱至發生啟晴邨警匪槍戰事件，市民驚魂未定，又見到機場保安出現大漏洞，簡直開門揖「恐」，馬航事件到依家都未查出真相，最近網上又流傳內地疆獨分子會來港生事，機場居然中門大開，慌死恐怖分子唔來香港做世界咩？連自己都保護唔到喇，點保護市民吖。
最好笑嘅係，保安漏洞醜聞曝光之後，當局煞有介事咁，又話調查，又話追究，一副嚴陣以待嘅樣子。其實，機場保安驚現甩漏都唔係第一次喇，次次都話調查追究，結果次次爆出醜聞。
一句講晒，機場保安大漏洞，安全城市不安全。官僚一個二個都有鋪坐飛機周遊世界嘅癮，你哋唔驚嘅咩？叮！
