城中鏡：翟少人緣好 歡送浪接浪
獨立監察警方處理投訴委員會（監警會）主席一職向來係「三煞位」，夾正喺警察同市民中間，偏頗少少都會被人鬧，但剛剛卸任嘅「翟少」翟紹唐算係少有獲得好評嘅一位。翟少同一班監警會委員合作咗咁耐，點都有少少交情，所以上星期佢主持完最後一次大會後，隨即同十一位監警會同事啤一啤。聽聞監警會歡送翟少嘅活動陸續有來，證明佢人緣真係唔錯喎！
監警會委員齊齊「隊啤」歡送翟紹唐（箭嘴示）。（互聯網圖片）
翟少做咗咁多年監警會主席，深得一班同事歡心，好多人都唔捨得佢離任，所以監警會上下都有人同佢搞咗歡送活動，一班監警會委員等唔切正式歡送，上周開完會已經拿拿聲同佢去灣仔一間餐廳「隊啤」暢談，但現場所見唔係所有委員都到齊，原來呢次只係「前菜」，今個月中委員會再次同翟少食飯，正式歡送佢離任。嘩，食「散水飯」都要分開咁多次，睇怕翟少離任後要勤力做運動，先可以保持最佳身形。
