Samantha周倩圯近兩年因身體問題而需要中西醫調理，被迫推job，淡出T字形天橋，甚至絕迹公開活動。喺養病期間佢就重返校園修讀美容課程，曾透露希望能考獲美容師牌。

周倩圯早前冒雨睇舖，一邊擔遮、一邊睇手機，狀甚狼狽。

Samantha多次走出店外用手機狂影外貌與街景。

早前本報記者發現佢單拖喺大坑出現，當日係黃色暴雨警告，騷出美腿嘅佢擔住把透明遮，似是迷路邊行邊望手機，狀甚狼狽；及後佢走入一間美容纖體店，超初以為佢做facial，但後來見到佢喺店內同一名似係老闆娘嘅女士傾談，仲喺店內行嚟行去似是視察四周環境，不時指手畫腳，期間更多次走出店外拎手機狂影外貌同街景，又不停講電話，表情甚為肉緊，似向星級造型師「好友」Ricky郭慶彬問意見，大約逗留一小時便離去。

考美容師牌 花盡積蓄開舖

及後致電Samantha，佢喺電話中坦承數月前已透過經紀於香港區不停物色舖位開設美容纖體店，佢話：「依家租金好貴，但我又唔想再拖，反正我今年畢業試合格的話，就正式考取到美容師牌，長期打躉睇舖之餘，我亦會落手落腳幫客做facial！」

問到投資金額時，佢笑言係秘密，會用盡畢生積蓄，又話：「呢個係我個『B』，我期待緊佢出世，今鋪真係盡地一煲。」即係用盡積蓄湊大個「B」咁話喇！至於「好友」Ricky點樣支持佢創業？佢笑說：「盡在不言中啦！」

第一手消息請下載on.cc東網iPhone/iPad/Android/Windows Phone Apps