城中鏡：廠商青委龍舟賽盡興
舊年失落端午龍舟競賽獎項嘅中華廠商聯合會青委，今年捲土重來，尋日參加赤柱龍舟賽公開男女混合賽。雖然一眾青委早喺三個月前已勤加操練，但經過三輪激烈競爭後，最後亦同獎項無緣。
廠商會青委名譽主席周雯玲（左三）同一班青委成員連月鍛煉，非常團結。
廠商會會董吳國安（左起）、副會長徐炳光、吳清煥、李秀恒、吳永嘉同會董余德明，全程為青委成員打氣。
葉劉淑儀（右）派囡囡Cynthia代為出賽，最終只得第五名。
輸比賽 贏感情
廠商會一眾青委去年以一秒之差，得個「梗頸四」，為一雪前恥今年大家苦練多時。為咗幫隊友打氣，廠商會副會長顏吳餘英同青委副主席黃浩鈞，齊齊出動私伙遊艇撐場，作為各隊員休息站。另一副會長李秀恒就帶備長鏡頭充當攝影師，拍低各成員全情投入一刻。
陳淑玲、吳永嘉等副會長期間亦落力聲援，現場氣氛熱血沸騰。
雖然青委最後喺第三輪嘅銀碟賽中輸咗，但佢哋嘅成績比舊年進步咗一秒。青委主席張永鴻話最緊要大家開心同盡興，連月來嘅鍛煉同努力，培訓到大家嘅團結精神，仲令佢哋感情更加深厚。
至於匯賢智庫則參加咗沙田區賽，雖然身兼新民黨主席嘅葉劉淑儀、副主席田北辰同公民力量潘國山都有到場支持，但佢哋就淨係去切燒豬唔肯落水，得葉劉個女Cynthia肯親自落場扒龍舟，好彩最後都叫做攞到個第五名。
賽後Cynthia透露，尋日係佢首次喺端午節扒龍舟，雖然有少少緊張，但就覺得幾好玩，希望下次可以同媽咪一齊落場。囡囡開到聲，葉劉被問到明年會否披甲上陣，就即刻耍手擰頭，話要操弗啲先可以落水獻醜喎！
