早前政府話要發展大嶼山，繼成立諮詢委員會後，發展局局長「波波」陳茂波近日又不停招兵，該局近日一口氣登廣告招聘四個新職位，講明全部主責協助大嶼山發展，最高人工分別係基建項目同規劃項目嘅高級經理，兩個職位月薪高達八萬九千元。咁高人工要求當然唔低啦，前者要至少九年土木工程經驗，後者則要十年規劃工作經驗。除咗專業人士，發展局連對內同對外嘅支援工作都開位請人，例如月薪四萬七千元嘅項目統籌主任同月薪三萬一千元嘅傳訊關係主任。

設計圖片及對白

以現時波波高薪招兵嘅速度推算，不足半年內發展局已擁有大批規劃發展人才，可以講係已萬事俱備。再加上大嶼山應該點發展，坊間早已有唔少專業人士發表過意見，早前就有旅遊界人士、立法會議員、商界人士認為，大嶼山有絕佳地利，應該效法新加坡聖淘沙，整個島嶼發展成會議中心、遊艇中心、度假酒店、賭場娛樂嘅「四合一旅遊天堂」，將吃喝玩樂集於一身。所以波波唔好再齋噏，係時候手起刀落，唔好再議而不決、決而不行，否則大嶼山只會淪為下一個西九文化區。

其實，將大嶼山發展成旅遊島，既可開創就業職位，又可增加政府稅收，唔使一味只係識得喊稅基狹窄，但就冇擴闊稅基嘅良方。既然已有高人指路，咁就要睇吓波波嘅決心有幾大喇！

第一手消息請下載on.cc東網iPhone/iPad/Android/Windows Phone Apps