政府每年都會就七．一搞一連串活動，今年佢哋就將活動主題定咗為「活力．愛」，驟眼睇活動主題名好似冇乜特別，但原來係經過政府中人精雕細琢。話說政府原本打算將今年嘅活動主題定為「愛．活力」，但因為擔心會被人將主題同本港近年冒起嘅「愛」字頭團體扯上關係，為免惹人聯想，最終都係決定將「愛」同「活力」嘅排序調轉。其實咁樣調一調，仲可以同「讓愛與和平佔領中環」劃清界線，真係一舉兩得。

設計圖片及對白

名稱諗過度過

近年出現咗唔少「愛」字頭嘅親建制團體，包括「愛港之聲」、「愛護香港力量」同「愛港行動」。不過，呢啲團體成立以來都引起唔少話題，所以就算佢哋係撐政府嘅組織，都令政府中人怕怕，連政府活動嘅主題同宣傳標語都要避免用「愛」字行頭，費事令人覺得政府同佢哋有乜嘢關係。今次「活力．愛」呢個主題就係其中一個例子，早前有區議會七．一活動仲係用「愛與活力」做主題，但近日就發覺有區議會將主題改為「活力．愛」，可見「活力」與「愛」應該點擺位都真係要諗過度過o架！

另外，有消息話民政事務局局長曾德成嚟緊將會同廣東社團總會、廣西社團總會同福建社團聯會等多個本港親中團體聚會。其實德成局長對上一次同呢啲團體聚會已經係三年前本港申辦亞運嗰陣時，依家又再正值政改多事之秋，所以有人就質疑政府「有事鍾無艷，無事夏迎春」，搵呢啲團體幫政府造勢。

不過，消息人士就話，當局並唔係「有事鍾無艷」，只係咁啱多個社團都換屆，所以都趁機會聯絡一下啫。乜真係咁簡單？

第一手消息請下載on.cc東網iPhone/iPad/Android/Windows Phone Apps