少年識盡愁滋味 走上街頭一聲吼

都話少年不識愁滋味，點解有咁多小朋友走上街頭呢？鬼咩，咪又係港府施政無能，搞到香港貧富懸殊惡化，貧賤夫妻百事哀，小朋友又點可能唔愁吖。高官講就好聽嘞，一時制訂貧窮線，一時搞低收入在職家庭津貼，一時話關心青少年發展，睇落動作多多，實際上卻係口惠而實不至。嗱，基層兒童及家長齊齊操去政府總部請願，唔係為乜，淨係要求港府兌現承諾，制訂兒童政策啫。

兒童貧窮問題到底有幾嚴重？先睇吓官方同學者點講啦，扶貧委員會推算，全港有一百三十一萬貧窮人口，其中不少係兒童；大學研究就更加得人驚，指全港貧窮人口高達一百四十七萬，當中二十九萬係兒童。即係話，平均五個港人就有一個貧窮，四個兒童就有一個貧窮，簡直係香港之恥。

正如社區組織協會批評，缺乏扶貧綱領及滅貧指標，貧窮線只係如同虛設嘅咋。佢哋建議港府倣效外國，訂立滅貧時間表，放寬低收入在職家庭津貼嘅申請資格，向中小學貧困學生提供免費早餐及午餐，為租住籠屋板間房居民提供租金津貼，關愛基金亦至少撥出四分一扶助貧窮兒童，高官你哋聽到未呀。

冇錯嘞，貧窮問題千頭萬緒，訂立貧窮線只係第一步。港府最近推出嘅低收入在職家庭津貼，聲稱可以大幅降低整體貧窮率及兒童貧窮率，令三萬八千個家庭脫貧，講到天花龍鳳，實情係有關計劃限制多多，門檻太高，結果得個講字，淨係要求申請家庭必須每月工作兩百個小時以上，已將唔少家庭摒諸門外。事關好多婦女都要照顧年幼子女，分身不暇，要求佢哋出外打工，根本係強人所難。

所以話啫，港產官僚唔係睇法國電影歎咖啡，就係坐喺冷氣房憑空想像，點會知道民間疾苦吖。好似託兒服務咁吖，有關注團體踢爆，全港約有十萬名兩歲以下兒童，託兒服務資助名額居然只得一千個咁大把，比例係一比九十九，「仲難過入大學」。咁你話嘞，基層家長就算有心出去打工都無能為力喇，係咪？

學毛伯伯話齋，青少年係八、九點鐘嘅太陽，希望寄託喺佢哋身上。港府無力解決貧窮問題，貧窮子弟輸喺起跑線上，香港點會有未來吖，叮！