城中鏡：東華密密開社企助就業
呢排零售業猛吹淡風，但有社企概念嘅餐廳、精品店同髮型屋就愈開愈多。東華三院主席Ivan施榮恆都計劃開社企花店，又加碼投資喺火炭開烘焙工場。
李三元（左）資助弱能人士去美國開畫展，施榮恆（右）第一時間預訂機票去捧場。
Ivan日前同一眾副主席同總理應邀出席東華三院歷屆主席會主席孫秉樞午膳聚會，Ivan就預告準備開社企花店，連舖位都搵埋，位於深水埗地段，依家正在裝修中，預計暑假後就可以開業。東華三院旗下服務單位多，年中有唔少畢業禮、就職禮同慶典等，齋做自己人生意，應該有得諗喎！此外，佢哋仲會喺火炭開多一間二千呎烘焙工場，加埋黃竹坑間餅房，可以為殘疾人士提供更多就業機會。
Ivan話殘疾人士天分好高，除咗識整餅，仲會畫出彩虹。東華三院已收集四十件由弱能人士創作嘅藝術品，八月將首次帶去美國洛杉磯展覽。東華三院前主席李三元自掏腰包逾百萬元，資助五位殘障藝術家同佢哋嘅家人去交流，擴闊眼界，認真唔話得。
