城中鏡：唐貝詩做姊妹 難忘又感動
名人寇鴻萍嘅大女Lydia唐貝詩，前日參加台灣藝人好友Sarina洪詠霖嘅婚禮，仲擔任對方嘅姊妹團成員添，Lydia坦言今次係佢首次做姊妹，覺得難忘又感動，佢話：「之前同媽咪參加人哋嘅飲宴就多，但真係企喺新娘隔籬睇住佢行禮就係第一次，最感動係見到兩家人影相嘅時候，覺得好幸福，我雖然唔係特別恨嫁，但見到人哋咁幸福，都會諗自己將來結婚時都會咁幸福。」
唐貝詩（右二）前日做台灣藝人好友洪詠霖（中）嘅姊妹。
洪詠霖同老公Nelson Lai上月已喺巴黎完婚。
吸收經驗 構思自己婚禮
Lydia話整個婚禮布置以唯美簡單為主，冇玩新郎之類，佢笑言亦都有趁機吸收經驗，構思將來自己嘅婚禮，佢話：「我覺得搞婚禮真係幾攰，聽朋友講結婚前一晚要做到凌晨，聽落好辛苦，所以我覺得結婚係一生人一次，希望喺結婚當日保持住開心嘅心態，所以我諗住所有結婚嘅籌備同準備工夫都交畀屋企人去做，咁我就唔使煩，可以開開心心咁出嫁。」
Sarina原來早喺上月二十七號喺法國巴黎已完婚，前日喺香港補擺喜酒，佢老公係喺香港從事煤礦生意嘅Nelson Lai，兩人約會唔夠三個月，男方就喺Sarina生日當天送上三卡鑽戒求婚。據悉今次婚禮豪花近千萬港元，前日新郎仲出動遊艇接新娘，婚紗同鑽戒全屬名牌，婚紗相亦由大師級攝影大師張文華操刀。
