依家潮流興用智能手機嘅影相功能記錄生活點滴，早幾日下晝大約三點四十五分，就見到政務司前司長唐英年太太唐郭妤淺一個人喺中環閒逛，期間佢穿梭於置地廣場同歷山大廈之間，不時隔住落地玻璃用手機影街景，就算引來途人好奇觀望，佢都照影可也，狀甚陶醉。

唐郭妤淺影完落地玻璃外嘅新顯利大廈，就打電話密密傾。

唐太差唔多過完天橋又再影街景，懶理途人目光。

當日唐太着住一身花花衫裙配襯平底鞋，一貫悠閒打扮，見佢一時影街景、一時又打電話。後來行到橫跨德輔道中嘅室內天橋時，更加左邊影吓、右邊又影吓，街頭街尾都唔放過，唔知係咪想捕捉繁忙街道上嘅車水馬龍呢？抑或換咗部新手機想試吓個影相功能？

學用手機影相功能

唐太笑笑口咁話部手機係舊機，佢只係想學吓使用手機影相功能，試吓將相片儲存喺手機入面。咦？唐太睇落咁新潮，乜原來連手機影相功能都好少用，真係意外。話時話，當日唐太影相嘅其中一個街景正對住新顯利大廈（New Henry House），咁啱唐唐英文名叫Henry，佢哋兩公婆經歷過一場充滿緋聞危機嘅特首選戰，雖然最終唐唐輸咗，但係唐太就搵番一個更加愛錫自己嘅老公，唔通佢覺得唐唐係New Henry，所以特別影低留念？

第一手消息請下載on.cc東網iPhone/iPad/Android/Windows Phone Apps