早前越南發生一連串排華暴動，令唔少喺當地有投資嘅港商受到唔同程度影響，包括店舖同廠房受到縱火焚燒破壞，以及財物遭搶掠等損失。喺越南設有鞋廠嘅仁濟醫院主席蘇陳偉香同老公蘇啟聲尋日現身沙田馬場時話，佢哋喺當地嘅鞋廠受影響同破壞唔算好嚴重，已經開始復工喇！

蘇陳偉香（左）同老公蘇啟聲（右）話旗下越南嘅鞋廠已經復工。

講到受破壞程度，蘇太話由於佢哋嘅鞋廠位於胡志明市，唔屬於暴動最嚴重嘅區域，所以相比起暴動期間較混亂嘅平陽省，損失唔算太大。不過，基於員工嘅安全理由，佢哋都以防萬一選擇停工，臨時將工廠關閉，兼且撤走所有中國籍員工同管理層。至於部分自願留守嘅台灣員工，則獲安排暫住酒店。

暴動期間，蘇太廠房嘅損失亦唔多，只係被抬走咗幾部電腦，好彩電腦內所有資料都有備份，所以好快就可以搵得番。佢哋工廠停咗兩日工之後，情況好快就有好轉，目前運作已經回復正常。

第一手消息請下載on.cc東網iPhone/iPad/Android/Windows Phone Apps