政壇：張炳趕住返港受靶

首先講吓珠港澳大橋香港口岸嘅工程，政府過去一年就工程七個項目招標，但由於多次出現截標延期嘅情況，工程完工日期亦要延長，超支達八十九億元。至於蓮塘口岸，就因為造價不斷上升，結果令項目超支八十五億元。其實同運房局有關嘅工程超支、延期都唔係第一次發生，好似廣深港高鐵香港段工程咁，延誤再延誤、超支再超支，就係一個最佳例子，最近又再超支三十四億元喇。所以運房局咁多工程，啲工程又咁多問題，做得咁慢，如果張炳唔親自坐鎮，點應付立法會議員嘅質詢呢？到時候，就真係唔知啲工程撥款申請會唔會全部被立法會否決嘞！

唔放心邱武留守

張炳今明兩日將會先後去希臘雅典出席大型國際航運展覽「Posidonia 2014」，向其他國家航運界推介香港提高增值服務業嘅優勢。佢之後就會為嗰個展覽嘅香港館主持揭幕禮，翌日去拜訪希臘海運、海洋事務及愛琴海部長，之後就即刻返港，改由副手、運房局副局長邱誠武接力，去倫敦同當地官員會面及拜訪航運組織，之後就出席香港工商協會嘅午宴同宣傳香港航運服務研討會，邱武亦會順道了解倫敦嘅房屋發展喎。要邱副接力，好可能信唔過佢留守香港，寧願益佢出去交際吓好過。