世界處處不太平 人間樂土何處尋

呢，泰國風雲變色，軍方突然宣布接管政府，多名政治派系領袖被帶走，搞到當地人心惶惶。有人可能會問，泰國政變啫，關香港乜嘢事呢？本來呢，泰國政變的確唔關香港事，何況又唔係第一次，大家早就見怪不怪，之不過咁，如果你打算去泰國旅遊，咁又唔同講法喇。日前越南發生反華騷亂，港府將旅遊警示提升到紅色，旅遊業議會即時叫停去越南嘅旅行團，依家泰國局勢混亂，港府同樣將旅遊警示提升到紅色，咁係咪應該暫停去泰國嘅旅行團呢？市民安全大過天，唔該當局打醒十二分精神，千祈唔好又後知後覺吖。

總而言之，君子不立危牆之下，泰國越南七國咁亂，避之則吉吖。當然喇，家陣世界立立亂，幾乎冇一個地方安全，有時真係避無可避。呢嗱，新疆烏魯木齊恐怖襲擊又造成三十幾人喪生，近百人受傷，呢次已經係當地一個月內第二次恐怖襲擊，簡直令人防不勝防。

大陸唔安全，台灣同樣恐怖，前日有兇徒喺台北捷運車廂斬死四名無辜市民，橫禍從天而降，問你驚未。

講番泰國政變，真係有理說不清。近年本港部分政客將民主吹到天上有地下無，好似有咗民主就可以解決所有問題，有咗普選香港就一天光晒，其實睇到泰國七國咁亂，就知道民主絕對唔係萬應靈丹。

嗱，泰國總理係一人一票選出嘅，點知憲法法院居然可以發動「司法政變」，頒令民選總理及內閣官員落台，問你服未。近年嘅泰國幾乎永無寧日，一時紅衫軍，一時黃衫軍，示威無日無之，政變沒完沒了，你話咁嘅國家點會有運行吖？咁嘅民主又有乜用吖？

話時話，香港同泰國不過係五十步笑一百步嘅咋。近年本港激進勢力日益抬頭，搞到社會愈來愈政治化，有人喺立法會玩拉布，有人喺街頭搞佔領，香港遲早爆大鑊吖。有人話，今日嘅泰國，可能就係明日嘅香港，絕對唔係杞人憂天。一句講晒，民主唔係唔好，但如果好似泰國咁，就算一人一票都冇用喇。

香港本來係人見人愛、花見花開嘅福地，家陣淪落到隨時步泰國後塵變成動亂之都，簡直令人不堪回首。正所謂，自作孽不可活，港人係時候反省喇，唔好自食苦果吖，叮！