城中鏡：行會副局瞓身撐特首
立法會尋日早上舉行特首答問大會，除咗各問責局官員出席外，一眾行政會議成員都乖乖坐喺公眾席上擺陣助聲勢。不過，竟然見到有行會成員同副局長當特首冇到，不時合埋雙眼，有啲閉目養神，有啲就真係瞓覺，齊齊「瞓身」撐特首。至於坐喺會議廳嘅議員亦唔多專心，好似漁農界議員「高佬賢」何俊賢就被發現上購物網，仲睇埋股市行情。另一議員「AV仁」何俊仁就病到缺席。
李國章加入瞓覺行列。
邱誠武（右）同梁敬國「瞓身」撐特首。
林煥光垂頭睇手機。
「AV仁」何俊仁因重感冒而缺席答問大會。
何俊賢被發現開會上購物網同睇股票。
就公眾席現場所見，行會召集人林煥光不時閉目養神，有時又垂下頭睇手機，都唔知係咪瞓咗。另一行會成員李國章、運輸及房屋局副局長邱誠武、商務及經濟發展局副局長梁敬國、政制及內地事務局副局長劉江華都加入瞓覺行列。記得立法會前議員黃宜弘當年都試過喺答問大會上瞓覺，但佢死撐話瞓覺係因為對特首施政有信心。莫非呢班行會成員及副局長亦對現任特首施政好有信心？
高佬賢睇股票上購物網
席上立法會議員又點呢？高佬賢就被發現喺特首發言時，上購物網同睇股票。佢解釋話只係冇閂購物網嘅網站，答問會期間完全冇睇過。
至於用手機睇股票，高佬賢就話係因為當時特首講緊樓市辣招同減辣政策，自己又唔太熟書，所以咪惡補吓囉，想睇辣招對地產股有咩影響喎。佢強調自己只持有一隻銀行股，用嚟儲錢，但絕對冇持有任何地產股，所以根本唔存在要睇實啲股票喎。
至於上次在政府公布財政預算案時睇艷照嘅AV仁，因患上重感冒而缺席答問大會，佢話一日打幾百個噴嚏，食完藥太眼瞓，所以迫不得已缺席。佢仲話每次病都唔去睇醫生，認為醫生開藥同自己買藥冇分別，所以食成藥「自醫」，到真係頂唔順時先求診，而今次好彩食完超級感冒藥就無事喎，咁大個人，認真兒戲。
