SUN搞作：網絡小說：沒有真相，只有效忠
肥仔恩嘅舊情人盛傳已被槍決，點知又有報道話佢出嚟發表效忠宣言，呢個死去活來嘅消息，對黑人總統嚟講可謂十分有趣，仲立刻召見前排去過北韓嘅籃板王，嘗試深入窺探呢個神秘國度。
「籃板王，肥仔恩舊情人到底係生係死？」五顏六色嘅籃板王笑道：「總統先生，喺神秘國度，君要你生便生，要你死便死，沒有真相，只有效忠。」一頭霧水嘅黑人總統決心問個明白：「咩叫沒有真相？唔通未食飯可以當食咗？」籃板王一聽當堂yo咗出嚟：「正是！我哋成日都聽到佢哋國家物資短缺，唔夠糧食，但係我去到見到個個容光煥發，跳晒開心舞咁，我懷疑佢哋真係可以未食飯當食咗，呢個就係效忠嘅力量！」
籃板王趕住溝女，好快就借尿遁走咗，留低黑人總統獨個苦思效忠力量之源。諗起肥仔恩立威之路，黑人總統終於明白：「效忠嘅力量原來係嚟自處決左右手！」總統望向房外嘅副總統同國務卿，突然泛起一絲莫名笑意，眼神亦流露出詭異兇光……
