中國科網新股接連喺美國上市，其中兩位CEO更係身價過億嘅超級筍盤，講緊嘅就係內地最大嘅化妝品電商股「聚美優品」嘅創辦人兼CEO陳歐同京東CEO劉強東，聚美上個禮拜五喺美國上市，陳歐仲成為咗史上最年輕嘅紐交所中國企業CEO添，佢今年得三十一歲咋。

年僅三十一歲嘅陳歐（中）成為史上最年輕嘅紐交所中國企業CEO。

講到年輕有為，80後嘅陳歐就絕對係表表者喇。佢喺四川出生，先後留學新加坡同美國，讀過番書果然係唔同啲。

陳歐喺二十七歲創立「聚美優品」，瞬間就成為咗行業嘅領頭者，仲得到紅杉資本嘅賞識，批咗過千萬美元投資。而佢就喺短短兩年後打入咗《福布斯》嘅創業者榜，上市之後個人身家已經高達十三億六千萬美元，即係過百億港紙，更加重要嘅係名草尚未有主喎，一眾單身女士真係要把握機會喇！

第一手消息請下載on.cc東網iPhone/iPad/Android/Windows Phone Apps