香港嘅勞工界正爭取提高最低工資金額，而瑞士最大工會SGB早前提出要將最低工資訂為每小時二十二瑞士法郎，即相等於港幣一百九十元，由全民公投決定是否支持建議。工聯會嘅立法會議員KK黃國健話唔覺得當地工會「獅子開大口」，但就略嫌工會過分進取，因為咁計一個月就會有成三萬多元，人人都可以過中產生活，聽落都有啲超現實。

雖然建議最後被大多數國民否決，但KK解釋，將最低工資訂得太高並唔係工會嘅錯，而係因為當地物價太高，先至令勞工界要出此下策。佢又透露，喺七至八年前代表勞工顧問委員會去瑞士日內瓦開會時，已經深深感受到當地高物價嘅威力。當時唔少勞工界前輩建議佢唔好入住日內瓦市內酒店，反而走去隔籬嘅法國租酒店住，再喺每朝搭二十五分鐘巴士去日內瓦開會，晏晝就食麵包算數，慳得一蚊得一蚊。

第一手消息請下載on.cc東網iPhone/iPad/Android/Windows Phone Apps