小學教師林慧思舊年爆粗辱警引起軒然大波，退休警司劉達強等多名退休同休班警員參加旺角行人專區撐警方集會，獨立監察警方處理投訴委員會（監警會）秘書長朱敏健將集會定性為「政治性質」，直指休班警員出席有可能違規，遭到劉達強等人反駁係「未審先判」，有人事後更向監警會投訴。事隔約十個月後，監警會調查結果力撐朱敏健當日言論係「公平、不存在偏見及具理據」。

設計圖片及對白

監警會早前合共收到六十六宗關於朱敏健、監警會主席翟紹唐等人評論撐警方集會嘅投訴，當中超過九成投訴係針對朱敏健，就此監警會成立由三名監警會管理委員會委員組成嘅專責委員會跟進調查，尋日發表合共六頁調查結果報告，並就質疑逐一作出回應。

對於朱敏健將集會定性為「政治性質」，專責委員會話留意到朱敏健曾引用孫中山對政治嘅定義，就係眾人之事，並指當時朱係以對政治性一詞嘅一般理解作出回應。至於「未審先判」嘅指控，專責委員會認為朱敏健再三強調，判斷有否警務人員違反警方內部守則時，需要整件事去評估，加上此事係咪恰當，較適宜係由警方管理層去判斷，因此判斷朱嘅言論無「未審先判」意向或不公平和存有偏見。

難洗「查自己人」潛在衝突

專責委員會喺總結部分更疑一錘定音，表示無證據證實任何一項投訴成立，而且唔認為朱敏健、翟紹唐等人喺毫無證據下向傳媒發表佢哋嘅意見，反指該六十六項投訴成因，相信係同未有全面理解或誤會有關人士言論或監警會職權所致。

雖然今次調查結果，終於還朱敏健一個清白，但專責委員會係由三名監警會管理委員會委員組成，難以洗脫「自己人查自己人」嘅潛在衝突，至於朱敏健會否就此甩身，還要睇該批投訴人有否下一步行動嘞！

第一手消息請下載on.cc東網iPhone/iPad/Android/Windows Phone Apps