政壇：鬍鬚曾 王銳強為銷售稅試水溫？
由財爺鬍鬚曾一手催生嘅長遠財政計劃工作小組，月前趁財政預算案出爐作出恐怖預言，推算香港最快七年後出現結構性財赤，但鬍鬚曾同時叫停開徵銷售稅（GST）嘅討論，話香港要維持低稅率環境，因此唔適合推行GST喎。不過，舊年由鬍鬚曾親自招攬埋班、加入工作小組嘅王銳強，尋日就以羅兵咸永道會計師事務所高級顧問身份，落足嘴頭推銷GST，究竟係同鬍鬚曾大唱反調吖？抑或係幫鬍鬚曾試水溫呢？
設計圖片及對白
王銳強尋日失驚無神就二月底公布嘅財政預算案舉行工作坊，開宗明義香港稅基狹窄，過去一直太過倚賴利得稅等直接稅收，同間接稅嘅比例達二比一，與其他地區趨勢成反比。佢又話全球已經有一百五十多個國家同地區以唔同方法實施GST，鄰近嘅馬來西亞亦計劃明年開徵百分之六嘅GST，似乎香港唔跟就走寶。
預期公眾唔接受
講到咁好，點解政府遲遲未再公開諮詢公眾呢？王銳強承認長遠財政計劃工作小組的確討論過推出GST，但考慮到香港目前財政狀況健康，未見有咁嘅急切性，加上預期公眾都唔會接受建議，所以一動不如一靜。
咁就奇喇，鬍鬚曾過去一直同工作小組「唱雙簧」預言香港財政岌岌可危，輪住警告香港要開徵新稅項，但埋門一腳總係分道揚鑣，鬍鬚曾一面話GST唔適合香港，王銳強就話香港需要GST，究竟香港何去何從？香港長期議而不決、決而不行，連係咪再推出GST諮詢公眾都畏首畏尾，難怪開徵GST多年嘅新加坡，今年競爭力已超越香港排第三啦！
