若要節約水資源 先要管好水皮官
香港競爭力節節敗退，樣樣落後於人，唯獨有兩樣嘢長期一枝獨秀，遙遙領先。第一樣係人均垃圾製造量，即使唔係全球第一，至少喺亞洲四小龍當中獨佔鰲頭。至於第二樣咯喎，就係人均耗水量嘞，香港同樣冠絕全球，連倫敦及新加坡等大城市都望塵莫及吖。
水務署日前推出「齊來慳水十公升」運動，發展局局長陳茂波可能想吹水兼抽水，尋日喺網誌煞有介事咁呼籲市民珍惜食水。佢話喎，香港住戶每人每日平均食水耗用量高達一百三十公升，沖廁水約九十公升，總計量比其他大都會好似新加坡及倫敦等為高；又話水務署已經展開多項開拓水資源計劃，包括研究發展海水化淡及擴大海水沖廁供應網絡，咁即係自吹政績咋。
然後陳茂波話鋒一轉，將浪費水嘅責任推畀市民，話政府主導開源，節流就要靠市民喎，佢仲教咗幾招畀大家添，例如縮短花灑沐浴時間一分鐘，可以慳水十公升；刷牙同剃鬚時唔長開水龍頭，一家四口可以慳水二十六公升；以浸洗代替沖洗蔬果，每日亦可以慳水十四公升咁話。
即係咁，節約用水係絕對環保正確嘅，畢竟水資源真係好矜貴。先唔講世界上有唔少地區仍然飽受旱災之苦，就算香港都曾經嘗過怒呼「樓下閂水喉」嘅制水苦日子，常將有時思無日，今日市民身在福中應知福，冇理由繼續洗腳唔抹腳，白白浪費水資源。問題係，喂，邊個至係浪費食水嘅超級大戶呢？唔係用花灑沐浴嘅陳先生，亦唔係用水龍頭沖洗蔬果嘅梁師奶，而係不斷大量糟蹋珍貴食水嘅港產官僚吖！如果水務署繼續任由水管日爆夜爆、日漏夜漏，街頭巷尾「噴泉」不斷，市民點慳水都唔夠畀佢哋糟蹋喇，嘥氣！
唔係咩？單係因為本港水管殘舊，每年漏水量已經超過兩成，合計二億立方米，涉及金額七億元。唔該港產官僚用盆水淋醒自己喇，係二億立方米食水吖，市民要節約到乜嘢程度至補得番呢條數吖？
講到海水沖廁，更加令人扯火。直到今時今日，香港仍然有好多地區用食水沖廁，每年有八千二百萬立方米食水沖落鹹水海，講起都折墮。難為當局面皮成尺厚，居然將污點當政績，簡直不知所謂。
所以話，由嘥水官僚呼籲市民珍惜用水，等如敗家仔教節約，說服力大極有限。學古人話齋，己身不正，雖令不行，唔該水皮局長做好自己份工，管好你班水皮下屬，唔好再浪費珍貴食水吖，叮！
