城中鏡：史泰祖廚餘種田享天倫
愈嚟愈多人響應環保嘅概念，嘗試自己種蔬果。好似皮膚科醫生Louis史泰祖咁，亦有呢方面嘅興趣，日前佢就同家人去咗上水摘青瓜嘞。話說佢○八年就已經開始自己種植蔬果，近年仲習慣用屋企嘅廚餘做再造肥料，少咗垃圾之餘，又有收成，仲可以每個禮拜都同家人享受天倫樂添，一舉多得！
史泰祖每逢禮拜三同禮拜日都會盡量抽空打理上水嘅農田。（互聯網圖片）
Louis禮拜日一早去完聖堂就同太太、囡囡帶埋愛犬一齊入咗上水坑頭村，佢哋習慣喺村內嘅飯店食晏，貪啲餸菜清新又好味，然後就齊齊去打理農地。佢話嗰度塊地種咗好多生果同菜，包括十幾棵香蕉樹、荔枝、龍眼同菠蘿等，所以每逢禮拜三同禮拜日佢都會盡量抽時間去打理植物，有時仲會同隔籬鄰舍互相幫忙，好似尋日佢就幫隔籬摘青瓜。
不過，原來除咗種菜，佢仲有另一個任務o架，就係視察環境嘞！由於下禮拜佢會帶啲義工入上水，探望一啲院舍兼招待院友晚上一齊燒烤，所以今個禮拜佢就特別去咗鄰近嘅上水圍村視察，咁啱仲畀佢遇到村長，一路上向佢熱心介紹廖萬石堂同該區嘅歷史，佢話多得村長介紹佢先知道廖萬石原來唔係一個人嚟，而係形容以前好多廖氏做官，俸祿加埋有一萬石咁多咁解喎！
