政壇：黃之鋒赴台遭跟蹤偷拍
早幾日學民思潮召集人黃之鋒同兩名成員去咗台北，上禮拜五仲同六四學運領袖王丹、反服貿學生領袖陳為廷見面。點知見面之後，黃之鋒跟住嗰兩日就懷疑被人跟蹤，由酒店跟到捷運，一邊跟一邊用手機影佢哋相，引述對方聲稱想偷拍到佢出入夜店。佢哋尋日終於頂唔順，話擔心安全受威脅，寧願提早幾個鐘飛返香港喎!
黃之鋒話擔心安全受威脅，提早幾個鐘飛返香港。（資料圖片）
黃之鋒喺社交網站貼文，先係話有人直接打電話去佢酒店房間，用國語邀請佢做訪問，令佢質疑點解有人知道佢住處；到佢哋前日出外觀光，踏出酒店就見到一名灰衫男子跟住佢哋，由便利店跟到捷運站，對方一直用手機影佢，又用廣東話傾偈，返到酒店又有黑衫男子攞手機影佢。
點知尋日朝早出門時，黃之鋒又見到灰衫男子，於是上前質問，對方話係受「香港客戶」委託，提供埋黃之鋒酒店地址，希望可以偷拍到佢出入夜店等畫面喎。佢哋擔心人身安全，原定尋晚十點先走，改為下晝兩點就返港。黃之鋒話，如果有人想影佢相唔使咁麻煩，講聲就得啦！
