方平（左）同譚惠珍（右）嘅聯合辦事處尋日開幕，方平忙到連件西裝褸都濕埋。
舊年發表嘅施政報告推出社區重點項目計劃，各區議會可以獲一億元撥款，用作改善區內設施或其他用途。葵青區議會半年前開會後決定向居民提供牙科等社區健康服務，但主席方平尋日投訴，雖然撥款喺區議會破天荒咁得到所有黨派支持，但就受立法會拉布戰影響，遲遲唔可以攞上財務委員會表決，令區內老人家等了又等。
方平同區議員譚惠珍嘅聯合辦事處尋日開幕，譚惠珍話區內唔少老人家不時去佢嘅議員辦事處，問佢幾時可以免費剝牙同驗眼，搞到佢都唔知可以點答。拉布戰都唔知幾時結束，睇嚟佢哋嘅新辦事處都係要繼續接收老人家查詢嘞！
有傳譚惠珍做埋今屆就唔再連任，而委任區議員方平就轉戰直選接替佢個議席，咁啱兩人選擇喺青衣長安邨開設聯合辦事處，唔知傳聞係咪真呢？方平話仲未諗下屆係咪轉戰直選，但就話自己愈做區議員愈投入；譚惠珍話無諗住咁快退休，又話自從方平決定落地區幫手，佢即時可以派足千四隻糉畀街坊，比以前多咗足足兩倍喎。
第一手消息請下載on.cc東網
