明年底舉行新一屆區議會選舉，有意參選者依家落場做地區工作試水溫都唔算遲，其中上屆一直打正旗號狙擊白鴿黨嘅人民力量，我哋聽聞佢哋嘅成員「快必」譚得志，今年起密密去天水圍天耀選區做地區工作，睇嚟志在參選，仲要一嚟就打「大老虎」，想搶奪建仔雙料議員梁志祥個議席，真係藝高人膽大。

「快必」譚得志有志參加區選，仲疑似想打梁志祥呢隻「大老虎」。（資料圖片）

我哋問過快必，佢承認由今年初農曆年前後，開始跟人力新界西立法會議員「大舊」陳偉業落去天水圍天耀區幫手寫揮春，跟住就打蛇隨棍上兼職做社區總幹事，每月收兩千蚊人工，呢半年嚟繼續喺該區搞活動，仲跟進輕鐵巴士重組，連屋邨晾衫架都理埋。

咁係咪諗住決定參選？雖然快必把口話自己係初生之犢，暫時跟住大舊，唔知可唔可以挑戰到大老虎，但就話上屆梁志祥自動當選，好多居民話想有人挑戰喎，擺到明做定功課。人力打建仔，白鴿黨咪好開心？快必講到明，如果白鴿黨喺佔中或真普聯講一套做一套，出賣選民，唔止要佢票債票償，仲要滅佢黨喎！

第一手消息請下載on.cc東網iPhone/iPad/Android/Windows Phone Apps