政壇：回味美荷樓吳克儉收西瓜波

尋日有團體邀請城中名人分享美荷樓嘅獨特回憶，深水埗區議會主席Jimmy郭振華就話細個時住喺巴域街第二十四座，平時行去街尾嘉頓麵包廠附近飲茶都會經過美荷樓。佢話每逢十月十日「雙十節」，美荷樓街坊就會懸掛一幅巨型青天白日滿地紅旗，當時細細粒嘅佢覺得非常震撼。佢仲話細個佢好鍾意喺屋企附近嘅街坊會踢波，踢到夜一夜都唔捨得走，經常要佢爸爸捉佢返屋企食飯喎！

教育局局長吳克儉就話，喺大學修讀社工系時都有去美荷樓探訪，當年香港制水，佢仲有份幫老人家將一桶桶水搬上樓。佢又話有聽過美荷樓出咗一名球星陳發枝，自言都好鍾意踢波。咁啱大會送贈唔同嘅童年玩具畀嘉賓時，佢收到一個西瓜波，見佢即刻笑晒，仲即場用手拍打試下個波嘅彈力，個畫面都幾趣怪。