政壇：曾鈺成慶生唔畀蔣麗芸錫錫
一眾立法會議員尋日趁中午休會，為立法會主席曾鈺成同立法會議員Ann蔣麗芸慶祝生日。生日又再適逢拉布，曾鈺成坦白話，近日有某議員表示，如果唔想佢喺議會內講嘢，一係就係佢病咗，一係就係出唔到聲。曾鈺成自言今年嘅生日願望就係同呢樣嘢有關，仲自嘲「唔係好好心」。其實曾鈺成與其詛咒人哋，為自己添口孽，不如落手剪布仲好喇！
曾鈺成（右）公開拒絕蔣麗芸（左三）獻吻，難怪蔣麗芸咁激動。
尋日係阿Ann正日生日，曾鈺成就係今日生日。記得舊年此時立會又係拉布，期間阿Ann幾次發言都被曾鈺成寸爆，搞到佢好冇癮。後來曾鈺成趁兩人一齊切蛋糕時，錫咗佢一啖，算係一吻泯恩仇。尋日大家起哄叫阿Ann錫番曾鈺成一啖，但曾鈺成就耍手擰頭，原來舊年曾太見到佢同阿Ann錫錫張相後，嬲足三日，所以今年佢唔敢再造反。
着到紅噹噹嘅阿Ann就一本正經咁話，有位喺伊拉克返香港嘅朋友同佢講，見到當地通街都係荷槍實彈嘅人，返到香港就覺得好平安同開心，希望大家一齊建設香港咁話。
