葉劉（右四）、田北辰（左四）同多名公民力量嘅成員喺立法會食飯聯誼。
話說新民黨同公民力量早前未拍拖先「閃婚」，結盟三個月來傳出過唔少磨合問題。尋日中午喺立法會宴會廳撞到佢哋，原來係身兼立會議員嘅新民黨主席葉劉淑儀同副主席田北辰，請咗十多位公民力量成員嚟立會食飯，一邊抗拉布、一邊聯誼。佢哋離開時咁啱遇上大雨，葉劉就笑言代表咗佢哋「風雨同路」喎！
葉劉又透露，佢哋嚟緊會去珠海橫琴旅行，喺當地一間新開張、以海洋世界為主題嘅度假區共度一宵，新民黨同公民力量嘅黨員、支持者同義工，合共近千人參加，要十幾架旅遊巴先載得晒。之後佢哋仲會組隊參加下個月嘅端午節龍舟賽，葉劉囡囡葉榮欣都會落場。不過，扒龍舟好講默契，唔知兩批人到時夠唔夠合拍呢？
去完旅行、扒完龍舟之後，佢哋仲會搞番個集思會，傾吓點樣加強兩個組織嘅融合，同埋明年區議會選舉同一六年立法會選舉嘅部署。搞聯誼、搞選舉，全部都要錢，葉劉就話經費問題佢哋當然會諗，從來毋須個別黨員為個黨籌款。
第一手消息請下載on.cc東網
