胡蓉（右）同葉蘊儀喺畫展中合照同交流藝術心得。
藝術家胡蓉尋日為個人畫展「草根簇」揭幕，城中好多名人都有嚟撐場，當中仲見到呢排紅爆電視劇嘅藝人葉蘊儀，原來佢喜歡睇唔同嘅藝術展覽。問到葉蘊儀有冇考慮開個人藝術展？佢坦言：「我一直都計劃緊，希望今年開到。唔可以話儲緊作品，不過我一路都有參與唔同嘅展覽，都差唔多時候做個人展。不過，我完美主義，每次都要從頭做過（啲藝術品）。」
葉蘊儀又透露自己做大型嘅藝術裝置，早前到威尼斯參展時，更要用飛機運送到當地，再喺當地裝置作品。另外，佢話喺○七年到德國欣賞一個雕塑展覽，令佢印象難忘，又話：「嗰個展覽唔係喺展覽廳睇，而係每人都要拎住地圖，跟住地圖搵唔同嘅藝術品。我當時租咗單車，周圍搵，好似尋寶咁，覺得好有趣同好好玩。同時都啟發咗我去諗，點解香港會冇呢一類型嘅展覽方法，可以將啲藝術品放公共空間裏面，啟發到我嘅創作。」
第一手消息請下載on.cc東網
