政壇：公聽會 樹根惡鬥莫乃光

立法會資訊科技及廣播事務委員會今日舉行公聽會，六十多個業界團體或個人會就IT認可架構表達意見，不過未討論就爆出業界分成兩大派，其中建制派力數IT認可架構由諮詢過程，到架構內容等多方面都有問題。

有業界中人質疑，香港電腦學會日後於IT認可架構有影響力，喺業界將會係「高人一等」；同時政府日後批出合約時，料業界認可人士才可競投，變相令業界中小企生存空間受到影響，質疑點解要急就章設立，唔等埋創新及科技局「開局」先跟進處理。

電腦學會前會長疑打壓其他屬會

自言喺業界浸淫三十年嘅立法會議員鍾樹根加入戰團，批評當局於此事有既定立場係「假諮詢」，一來政府資訊科技總監賴錫璋本身係電腦學會前會長，涉嫌有利益衝突，疑似打壓業界其他屬會嘅生存，二來IT認可架構未有同內地專業互認，加上涉以公帑為業界設立認可架構，反問日後係咪其他行業，如醫生、會計界等都要政府幫手籌組認可架構。

支持設立IT認可架構嘅立法會資訊科技界議員莫乃光反擊，指IT認可架構早於○四年，即單仲偕做業界議員時開始爭取設立，反問樹根自言有三十年業界經驗，究竟擁有邊啲專業學會資格。有熟悉賴錫璋嘅業界中人亦為賴抱不平，懷疑建制派係不滿賴當日喺鬧到滿城風雨嘅「上網學習支援計劃」一事揸正嚟做，變相炮打咗建制派既得利益者，所以趁機報復喎。公聽會未開始已經火花四濺，今日正式上演預料將會好戲連場。